A Biblioteca Pública Municipal de Moaña reabriu as súas portas tralas obras de remodelación, e estreando unha nova imaxe para o recuncho da literatura infantil e xuvenil. Marc Taeger decorou a sala cos seus debuxos, no proxecto “Bibliotecas Ilustradas” da Consellería de Cultura. Durante varias semanas, Marc Taeger realizou un traballo que destaca pola súa plasticidade e colorido, a base de elementos simbólicos vencellados á historia de Moaña e ao ambiente mariñeiro da vila.
Os visitantes acceden á biblioteca guiados por un paxaro con letras e adéntranse na sección infantil, na que se combinan animais, bosques e espazos mariños: unha balea, protagonista de contos clásicos como Moby Dick; o bosque de “A verdadeira historia de Carapuchiña”, libro ilustrado por Marc Taeger para a editorial KALANDRAKA; unha paisaxe urbana facilmente identificable polos nenos, cunha casa, un camión e unha rúa; situacións anecdóticas e surrealistas, como a estampa dunha nube que fai chover dentro dun paraugas; e a chiscadela artística á lenda moañesa sobre a ‘moura’ e a serpe, un animal asociado á protección das fontes da vida e símbolo da alma.
Marc Taeger é un ilustrador, deseñador e escultor afincado en Marín. Viviu tamén en Italia, Alemaña e Portugal. Estudou deseño gráfico en Barcelona e traballa para editoriais, institucións, axencias de publicidade e prensa escrita. A súa obra expúxose en Luxemburgo, Alemaña, China, Costa Rica, España e Francia, entre outros países. É deseñador da colección de narrativa da editorial FAKTORÍA K e ten ilustrado os álbums infantís “Aquiles o puntiño” e “A verdadeira historia de Carapuchiña”, editados por KALANDRAKA. Por este último foi galardoado co Premio Daniel Gil de Deseño Editorial 2005. O seu próximo libro infantil, que sairá editado no mesmo selo o vindeiro mes de novembro, titúlase “Garavanciño”, un conto popular adaptado por Olalla González WEB DE MARC TAEGER.....

A autora Victoria Lojo Vicente, de Vigo, co relato titulado "U.S.A.DO" resultou gañadora da VI edición do Certame de Microrrelatos "Lonxa Literaria". O 1º accesit correspondeulle a Xosé Alfredo Naz Fernández, de Vigo, pola obra titulada "Sete". Juan Zamora Lacasta, de Moaña, foi merecedor do 2º accesit. O xurado estivo formado por An Alfaya, Marcos S. Calveiro e un membro da Lonxa Literaria.

1º Premio:

U.S.A.DO.

Autora: Victoria Lojo Vicente

Cando nasa, botareino ó aire para que se vaia afasendo. Non deixarei que o vistan de mexeriqueiro, nada de lasadas nin de encaixes. Traxes enteiros, busos desde a cabeza ós pés. Cando nasa, xa me encargharei eu de mercarlle axóuxeres con formas de sol e de lúa. Peghareille no teito da habitasión, enriba do berce, estreliñas de cores que brillan coa escuridade. Cando nasa, nada de darlle a teta que non se sabe se come ou non. Comida de farmasia, esa é boa, botes coas calorías e as proteínas ben contadas, as ghraxas para os que non terán que loitar coa ghravidade.

Aprenderá a nadar e a aboiar. Tan pronto nasa, tense que afaser a vivir sen osixeno. Desenvolverse flotando, aínda que sexa na augha, é o importante. Ghatear que ghateen os ghatos. Seralle mellor coñeser as estrelas, as constelasións, os planetas e os satélites que os números e as letras. Contareille contos de viaxes ó funil dos buratos negros. Contando nove meses desde hoxe, naserá en xullo do 2009, corenta anos despois do paseo polo mar da tranquilidade. Botádeme outra copa, aproveitando a voda do seu pai, voume pór de pé para brindar polo futuro do meu futuro neto na N.A.S.A

E non lansará nasas ó mar coma min. Lansará Apolos o espasio. CHIN CHIN.

1º Accesit:

SETE

Autor: Xosé Alfredo Naz Fernández

Sete corpos son pousados con violencia polas ondas dun mar bravo nunha noite de treboada. Sete mariñeiros sen vida arrolados pola escuma nunha praia trocada en cadaleito. Sete pais de mariñeiros pechan puños con xenreira ata facerse sangue coas unllas e cospen no mar inxurias e xuramentos de vinganza. Sete nais de mariñeiros mesturan bágoas con salitre e rabuñan nas areas por esfolar a un mar que non entende de remorsos. Sete mulleres de mariñeiros enloitaron o seu talle no silencio da ausencia en sabas brancas e murcharon os seus beizos de bicos xa nunca dados. Sete fillos de mariñeiros envelleceron aquel día, engurrando toda a súa infancia nun suspiro e mudando en inverno a primavera dos seus anos. Sete nais e sete mulleres de mariñeiros fiaron día e noite rede con rede e arame con arame, por facer entre todas a nasa máis grande que as súas mans puidesen, unha gaiola para sempre, tecida coa dor das que viven incompletas. Sete fillos de mariñeiros puxeron de ceba no máis fondo palabras de esperanza, de ilusión, de amor e de vida, pois iso fora o que lles quitaran. Sete pais de mariñeiros, cada noite saen ao mar, por botar a nasa, por coller o corazón do mar, por quitarllo, como el fixo con parte dos seus. Ollo por ollo.

BSO:"Balada dos sete mariñeiros" (Fuxan os Ventos)

2º Accesit :

Sen título

Autor: Juan Zamora Lacasta

Nasa por aquí...

Nasa por alá....

¡Oh! ¡Unha nécora!

O próximo martes, día 25 de novembro, os nenos de Moaña poderán asistir á representación de teatro de títeres "Sombreiros sen chapeu" a cargo da compañía Tanxarina. Este acto forma parte do programa "Títeres na Escola" da Deputación Provincial de Pontevedra

Dous días despois, o 27, a compañía teatral Casahamlet representará a obra Remoldiño vai á feira, basada no libro do mesmo título escrito por Xoán R. Cuba e ilustrado por Óscar Vilán. Unha vez finalizada a función, os nenos asistentes recibirán un agasallo moi especial. Esta actividade enmárcase dentro da campaña de animación lingüística "Voces á orella" promovida pola Secretaria Xeral de Política Lingüística.