ACTA 03/2002
ACTA DE SESIÓN ORDINARIA DO CONCELLO REALIZADO O DÍA 11 DE ABRIL DE 2002
ORDE DO DÍA:
1.-APROBACIÓN, SE PROCEDE, DA
ACTA ANTERIOR.
2.-DAR CONTA DAS
RESOLUCIÓNS DA ALCALDÍA.
3.-RATIFICACIÓN, SE
PROCEDE, S/ RESOLUCIÓN DA ALCALDÍA SOBRE MODIFICACIÓN DO
PRAZO DE CARENCIA DO PRÉSTAMO CO BCL.
4.-MOCIÓN DE EdeG-OV S/ DEFICIENCIAS NO SERVICIO DE RECOLLIDA DO
LIXO.
5.- MOCIÓN DO BNG S/ CONSTRUCCIÓN DO CENTRO DE SAÚDE.
6.- MOCIÓN DO
PSG – PSOE S/ PACTO LOCAL.
7.- MOCIÓN DO
BNG S/ SEGURO DECENAL NAS
EDIFICACIÓNS.
8.- MOCIÓN DE EdeG-OV S/
ESTABLECEMENTO DA TAXA TOBIN.
9.- ROGOS E PREGUNTAS.
CONCELLEIROS:
D. Javier Abal Juncal
D. José Manuel
Cordeiro Portela
D. Alberto Currás
Piñeiro
Dna. María C.
Costas Gayo.
D. José González
González.
Dna. María Martín
Alonso
Dna. Carmen
Sotelo Pena
Dna. Carmen
Entenza Domínguez.
D. Osbaldo
Martínez Couso
D. Julio Martínez
Rodríguez
D.
Xosé Manuel Millán Otero.
D.
Rosendo Moreira Piñeiro.
D.Serxio Regueira
Gómez.
Dna. Isabel
Lorenzo Martínez.
D. José
E. Santos Leites.
Secretario . D.
Felipe Fermoso Valdés
Na casa do
concello de Moaña, o 11 de abril de 2002, reúnense os devanditos señores baixa
a Presidencia do Sr. alcalde, D. Javier Barreiro Tenorio, asistidos por min, o
secretario, coa finalidade de realizar o Pleno Ordinario da Corporación,
anunciado para o día de hoxe ás 20:00 horas, en primeira convocatoria.
A presidencia declara aberta a
sesión ás 20:00 horas.
INCIDENCIAS:
Xustifica a súa ausencia a este acto D.
José Luis Leite Fraga e se retira durante o seu desenvolvemento ó finalizar o
debate do punto núm. 7 da orde do día Dna. María Carmen Costas Gayo, ás 22:20
horas.
1.-APROBACIÓN, SE PROCEDE,
DA ACTA ANTERIOR
Dáse conta do borrador da Acta 2/2002,
do 14 de marzo de 2002. Apróbase por unanimidade sen modificacións.
O portavoz do PSOE D. Julio Martínez
suxírelle á Presidencia que, por mor dunha maior brevidade posible, se utilice
o acceso ás actas mediante correo electrónico; o alcalde contéstalle que se
terá en conta a súa petición.
Seguidamente, a Presidencia le a
proposta de declaración institucional do Concello de Moaña sobre a situación do
pobo palestino, que subscriben os grupos municipais, a dita proposta di como
segue:
“PROPOSTA DE DECLARACIÓN INSTITUCIONAL DO CONCELLO DE MOAÑA
SOBRE A SITUACIÓN DO POBO PALESTINO
O
pobo palestino vén sufrindo desde hai décadas unha situación absolutamente
irracional e inxusta marcada pola privación de dereitos tan fundamentais como
de vivir en liberdade na súa propia terra.
Esta situación veuse agravada nos
últimos meses como consecuencia da escalada militar do goberno israelí, que se
materializou mediante a ocupación dos territorios baixo xurisdicción palestina,
as detencións masivas, os ataques militares contra a poboación civil que
producen centos de víctimas inocentes e o acoso á Autoridade Nacional
Palestina.
Ninguén pode permanecer alleo a un
drama que cada día adquire unhas proporcións xigantescas, e que deriva nunha
escalada irracional de violencia que ten como víctimas directas tanto a
poboación civil palestina como a poboación israelí.
O Concello de Moaña súmase ó clamor que
desde diversas instancias sociais e institucionais de todo o mundo se está a
producir para poñer freo a esta situación e, en consecuencia, acorda o
seguinte:
1.- Demandar o cesamento inmediato de
hostilidades e agresións por parte de Israel, comezando polo abandono inmediato
dos territorios ocupados.
2.- Condenar a actuación do goberno de Ariel
Sharon por atentar contra os dereitos humanos máis elementais e contra o
dereito internacional, e por incumprir sistematicamente as resolucións do
Consello de Seguridade da ONU.
3.- Solicitar unha intervención activa e
directa da Comunidade internacional para conseguir unha paz duradeira e xusta
en Palestina e Israel, situación que debe ter como fundamento e dereito da
comunidade Palestina a contar cun
estado propio e recoñecido no ámbito internacional. Neste sentido, e tendo en
conta que o Estado español ocupa nestes momentos a Presidencia da Unión Europea, o Concello de Moaña
demanda do Goberno español unha maior presión política sobre Israel para deter
a actual ofensiva bélica contra o pobo palestino.
O Pleno da Corporación acorda facerlles
chegar esta declaración plenaria ó Goberno español e ás representacións
diplomáticas palestinas e de Israel en España.
Moaña, 4 de abril de 2002
GRUPO
MUNICIPAL DO BNG
GRUPO
MUNICIPAL DE PSG-PSOE
GRUPO
MUNICIPAL DE PP
GRUPO
MUNICIPAL DO EdeG-OV”
Faino o portavoz do PP, D. Alberto
Currás Piñeiro, para manifestar que apoia a título persoal, esta declaración
institucional, pero hai que acordarse dos fallos e deficiencias de ambos os
contendentes, por iso condenan á vez a conducta observada pola Autoridade
Nacional Palestina.
A Corporación, en votación ordinaria e
por unanimidade dos asistentes, acorda apoiar a declaración institucional
transcrita.
2.-DAR CONTA DAS
RESOLUCIÓNS DA ALCALDÍA
A Corporación queda ó corrente. O
portavoz de EdeG, D. Euloxio Santos Leites, pregunta sobre a resolución dictada
polo Sr. alcalde en relación cos embargos ó Concello, en relación coa
urbanizadora Golf-Domaio, que aínda entende que é competencia da súa
autoridade, débeselle dar conta á Comisión Informativa correspondente. O
alcalde aclara os motivos da dita resolución.
3.-RATIFICACIÓN, SE
PROCEDE, S/ RESOLUCIÓN DA ALCALDÍA SOBRE MODIFICACIÓN DO
PRAZO DE CARENCIA DO PRÉSTAMO CO BCL
O alcalde informa a Corporación da súa
Resolución do día 22 de marzo de 2002, dictada ó abiero do informe de
intervención achegado, que se refire á ampliación da carencia do préstamo
concertado co Banco de Crédito Local.
A dita resolución para a cal solicita a
ratificación do Pleno, di como segue:
“Préstamo con el Banco de Crédito
Local de España, núm. 19925773
. Modificación del plazo de carencia.
Formalizado prestamo con el Banco de
Crédito Local de España, el 28 de diciembre de 1999, número 19925773, por
importe de 2.099.336,03 euros, teniendo en cuenta que vencido el prazo de
carencia inicial, por razones de liquidez de tesorería, interesa a este
Ayuntamiento ampliarlo por un ano más, visto el informe del Interventor,
RESUELVO:
Concertar con el Banco de Crédito Local
de España, S.A., la modificación de las condiciones contractuales del referido
préstamo en el sentido de ampliar por un año el perido de carencia de
amortización y prorrogar, asimesmo, un año el vencimiento final de la
operación.
Sen perjuicio de la ejecutividade de
esta Resolución, se deberá dar cuenta al Pleno del Ayuntamiento para su
ratificación en la próxima sesión que celebre.”
O Sr. Millán Otero manifesta que non
pode apoiar en modo ningún a presente resolución, pois iso significaría a
ampliación da débeda existente; considera que o PP coa súa maioría absoluta,
non é capaz de reducir o déficit.
O grupo de Goberno, a pesar da boa
etapa económica dende a súa constitución por falta de austeridade, logra
liquidez con toda clase de préstamos, desembocará ó cabo do seu período de
mandato nunha situación similar á de fai tres anos.
O Sr. Martínez Rodríguez non vai de acordo coa dita resolución, no
seu lugar, propón o refinanciamento da débeda Concello-Banco Cto. Local con
dous anos de carencia; con esta operación o único que se pretende é lograr máis
liquidez para que resolva a próxima corporación, por tanto non apoia a
operación realizada.
O Sr. Santos Leites di que o pretendido con esta operación é
lograr a carencia pero a base de custos económicos, autorizando a amortización
un ano máis. O PP comprometeuse a sanear as arcas municipais en catro anos e
aínda que considera que o proxecto é difícil, ben poidera dedicarse a reducir
en parte o déficit existente.
Coincide co resto dos portavoces no
sentido de que o período de bonanza económica habido nos últimos tres anos, non
se aproveitou, nin se repetirá e, sen embargo, do saneamento da entidade, nada
de nada; de contas, orzamentos e liquidacións, nada. A solicitude de anticipos
e outras operacións económicas non sanea, unicamente se logra aumentar a débeda
para que se faga cargo dela a próxima corporación.
Ó Sr. Cordeiro Portela sorpréndelle as
explicacións dadas polos grupos da oposición, cando saben de sobra que a
situación económica recollida polo actual grupo de goberno foi, cando menos,
vergonzosa e fai referencia a un montante total de tres mil douscentos millóns
de pesetas; cincocentos millóns de débeda financeira, douscentos millóns por
sentencias xudiciais firmes e outros a acredores. Nos quince anos anteriores
confeccionáronse todos os orzamentos con déficit e nas súas respectivas
liquidacións, coa excepción do liquidado en 1997, foron deficitarios. Deste
modo non se pagou a Seguridade Social,
Facenda, Fenosa, Seragua, etc. O
actual grupo de goberno minorou considerablemente a débeda cos provedores e cos
organismos sinalados anteriormente e nos exercicios 1999 e 2001 liquidáronse
con superávit, pagando ós acredores; polo tanto, as críticas da oposición non
teñen rigor ningún.
O Sr. Regueira Gómez, o refinanciamento
non supón máis que gastos para os veciños, os gobernos anteriores tamén pagaron
a pesar de ter gobernos de distinto signo, tanto na Xunta como Deputación, os
cales “lles cerraron o grifo”.
Replícalle o alcalde e recoméndalle que
cale a boca, porque está Vde. implicado en contas de saneamento en Domaio, as
cales non lle foron aboadas polo anterior grupo de goberno, ó consideralas
incorrectas.
O Sr. Martínez Rodríguez dille ó
delegado de Facenda que lle defraudou a súa xestión económica, o único que fai
é unha interpretación electoral da economía municipal.
O Sr. Millán Otero reitera que non
confía na xestión de goberno porque non existe transparencia nela, en
definitiva, non hai datos obxectivos e pregunta ónde se reduciu a débeda. Non
está en contra de refinanciar pero cunha xestión económica rigorosa, non con
enganos e recórdalle ó concelleiro de
Facenda que a débeda existente non é imputable ós partidos políticos senón ó
propio concello.
Replica o Sr. Cordeiro para dicirlle
que existen documentos de refinanciación de débeda subscritos polo Sr. Abalo.
Nas contas, o importante non é a súa presentación nos prazos establecidos,
senón os seus resultados. Finalmente, o concelleiro de Facenda fai uso das
partidas asignadas no orzamento para afrontar os gastos correspondentes, só e
exclusivamente.
A Corporación, en votación ordinaria e
por dez votos a favor (Srs. Barreiro Tenorio, Currás Piñeiro, Cordeiro Portela,
Abal Juncal, Costas Gayo, González González, Sotelo Pena, Martínez Couso,
Martín Alonso e Entenza Domínguez do PP) e seis en contra (Srs. Millán Otero,
Moreira Piñeiro, Lorenzo Martínez e Regueira Gómez do BNG; Sr. Martínez
Rodríguez do PSOE; e Sr. Santos Leites de EdeG) acordan:
1.- Ratificar nos seus propios termos a
resolución da Alcaldía do día 22 de
marzo de 2002.
2.- Remitir a certificación do presente acordo
ó Banco de Crédito Local.
4.-MOCIÓN DE EdeG-OV S/ DEFICIENCIAS NO SERVICIO DE
RECOLLIDA DO LIXO
Trala lectura da moción, o Sr. Santos
Leites adianta que, como o alcalde non acepta as mocións subscritas polos
colectivos veciñais, vese obrigado a subscribir a presente moción conxunta co
BNG-PSOE. Di a moción como segue:
“MOCIÓN CONXUNTA DO BNG, PsdeG-PSOE E EdeG SOBRE DEFICIENCIAS NO SERVICIO DE
RECOLLIDA DO LIXO E SITUACIÓN LABORAL DOS TRABALLADORES DA CONCESIONARIA
Transcorridos
quince meses desde a privatización do servicio de recollida do lixo, seguen
observándose deficiencias manifestas motivadas polo incumprimento reiterado por
parte da empresa do prego de condicións e do contrato de adxudicación asinado
entre Urbaser e a Mancomunidade do Morrazo:
-A
recollida non chega aínda a todos os barrios, a pesar de que as taxas son
idénticas para todos os veciños.
-Non se
realiza a limpeza de contedores coa periodicidade mensual estipulada no
contrato, mentres que o camión limpa-contedores cedido pola mancomunidade é
utilizado de forma irregular para prestar servicio noutros Concellos que teñen
adxudicado o servicio a Urbaser.
-A
recollida de papel, vidro e voluminosos segue presentando múltiples
deficiencias, en especial fóra dos núcleos urbanos.
-Non se
puxo aínda en marcha a recollida separativa de envases, a pesar do convenio
asinado no seu día entre os concellos do Morrazo e ECOEMBES.
-Suspendéronse
as campañas de información e concienciación social iniciadas fai cinco anos
pola mancomunidade, a pesar de que no contrato de adxudicación Urbaser adquiría
o compromiso expreso de dedicar o 2% anual dos seus ingresoso para este fin.
-Segue
sen solucionarse a incorporación á empresa concesionaria dos seis traballadores
subrogados pertencentes ó cadro de persoal do concello de Moaña.
A estas
graves irregularidades vén sumarse a situación laboral dos actuais
traballadores de Urbaser que prestan servicio no Morrazo. A pesar de que no
prego de condicións se fixaba con toda claridade unha serie de obrigas que
debería cumprir a adxudicataria, a estas alturas encontrámonos con que os
traballadores de Urbaser seguen nunha situación de precariedade que repercute
na prestación do servicio:
a)
Carecen de convenio colectivo, o que os sitúa nunha situación desfavorable con
respecto a outros traballadores da empresa limitando os seus dereitos laborais.
b) Os camións
que realizan o servicio fóra dos núcleos urbanos están dotados só de conductor
e un peón, coa consecuencia de frecuentes accidentes laborais e unha mingua na
calidade do servicio.
c) Non
se están cumprindo normas básicas de seguridade e hixiene no traballo: dotación
de vestiario insuficiente, condicións sanitarias precarias na nave da empresa,
etc.
d) Non
se respectan os períodos de vacacións e de compensación do traballo en
festivos.
e)
Estase acudindo frecuentemente á contratación de persoal mediante Empresas de
Traballo Temporal, opción explicitamente prohibida no prego de condicións da
adxudicación.
Sen
entrarmos en aspectos propios da negociación laboral entre empresa e
traballadores, os grupos municipais promotores desta moción entendemos que é
competencia da mancomunidade e das corporacións que a forman velar polo
cumprimento estricto das condicións pactadas no seu momento coa empresa, máis
aínda cando estas repercuten na calidade do servicio que se lles presta ós
veciños. Por iso, os grupos municipais do BNG, PsdeG-PSOE e EdeG propoñenlle ó
Pleno da Corporación que adopte os seguintes
ACORDOS:
a)
Instar a empresa e traballadores á negociación dun convenio digno que
regularice a situación laboral na empresa adxudicataria do servicio de recollida
do lixo e permita a súa mellora.
b)
Solicitar de Urbaser o cumprimento das obrigas laborais asumidas coa sinatura
do contrado de adxudicación do servicio e amosar o apoio da Corporación ós
traballadores na demanda do dito cumprimento.
c)
Reclamar a Urbaser unha solución inmediata e satisfactoria de todas as
deficiencias indicadas na exposición de motivos (ampliación da recollida,
limpeza e reposición de contedores, campañas de concienciación, recollida
separativa, etc.).
Moaña, 1 de abril de 2002”
E
concreta que aínda que o problema é empresa-traballadores, a mancomunidade non
pode obviar isto, pois está unida a través dun contrato e le unha das cláusulas
do prego de condicións, entre outras aparece a subrogación de traballadores.
Por iso, a mancomunidade non pode consentir máis tempo cos problemas actuais,
posto que queda claro que a empresa non cumpre o contrato.
O Sr. Millán Otero quere distinguir
dúas partes dentro da moción:
1.- Sobre a situación do servicio de
recollida en Moaña, é malo, non cumpre o prego de condicións, existe
precariedade no servicio, non se repoñen nin lavan os contedores. A separación
do lixo non se fai, tampouco se ampliou o servicio como consecuencia da
privatización, nin existiu campañas de información. Debe abrirse novo
expediente sancionador á empresa .
2.- Trato cos traballadores, refírese ós
seis de Moaña sen admitir a pesar da obrigatoria subrogación dos seus
contratos. Ós traballadores de Moaña puxéronlles para asinar os seus contratos
de forma moi pouco ortodoxa, con presións. O prego de condicións di que se
rexerán por un convenio e resulta que despois de quince meses no traballo, os
indicios do dito convenio son nulos, en conclusión deben de negociar os tres
alcaldes coa adxudicataria.
O alcalde, e en referencia o BNG,
táchao de ignorancia atrevida, parece que descoñece as conversas habida
respecto do tema; o presidente da mancomunidade preocupouse do asunto a través
de reunións coa empresa e traballadores. Recoñece que a empresa durante 2001
non funcionou ben, pero mellorará moito durante o 2002 aínda que
non o fará o 100%
En canto á privatización do servicio por
peche do vertedoiro de Moaña, as súas obras aí están, remata dicindo que a
presente moción ten moitas inexactitudes no seu contido.
A Corporación, en votación ordinaria e por unanimidade dos asistentes, acorda aprobar a moción presentada por EdeG.
5.- MOCIÓN DO BNG S/ CONSTRUCCIÓN DO CENTRO DE SAÚDE
Le a moción o Sr. Millán Otero, o texto
literal da cal di como segue:
“MOCIÓN CONXUNTA DE BNG, PsdeG-PSOE E EdeG
SOBRE A CONSTRUCCIÓN DUN CENTRO DE SAÚDE EN MOAÑA
O Pleno
do Concello de Moaña no mes de decembro do ano 1999 aprobou unha moción sobre a
situación sanitaria de Moaña que contiña os seguintes puntos:
1º
Construcción dun Centro de Saúde que cubra as necesidades sanitarias primarias
dos veciños de Moaña.
2º Que o
goberno municipal lle propoña á Consellería de Sanidade da Xunta de Galicia a
adecuación provisional do actual ambulatorio atendendo a aspectos tales como
entrada de ambulancias, ascensor, eliminación de barreiras arquitectónicas,
servicio de rehabilitación e fisioterapia, radioloxía, dentista e hixienista
dental, etc.
3º Que o
goberno municipal xestionase diante da Consellería de maneira inmediata a dotación
dun local digno para poñer en práctica os cursos de preparación pre-parto.
4º Que o
goberno municipal comece as xestións necesarias para a construcción dunha
piscina climatizada municipal que poida atender as demandas de saúde e lecer
dos nosos veciños.
Nos días
posteriores a esta aprobación –estamos falando de comezos do ano 2000- o Sr.
alcalde nos medios de comunicación manifestou que os aspectos ós que se refiren
os puntos 2 e 3 poderían ser acometidos de inmediato.
A
Plataforma da Sanidade de Moaña mantivo unha moi prudente espera ata xuño do
ano 2000, data na que solicitou que a informasen no Pleno do Concello sobre as
xestións levadas a cabo para executar aquel acordo plenario. Non houbo
resposta.
No mes
de setembro dese mesmo ano 2000, unha representación da Asociación de Mulleres
de Moaña reuniuse co Sr. alcalde. O Sr. alcalde díxolles que xa falara coa
directora provincial do SERGAS e que a solución pasaba por unha reforma da
actual casa do mar. Sobre a piscina informou de que entraría nos orzamentos da
Xunta do ano 2001.
O 12 de
febreiro de 2001, a Plataforma presentou no Concello unha moción para que se
acordase a inclusión no orzamento municipal dese ano unha partida para a
adquisición dos terreos necesarios para a construcción dun novo centro de
saúde.
Durante
o verán de 2001 celebráronse diversas entrevistas entre a Plataforma da
Sanidade e o xerente de Atención Primaria e a Delegación Provincial do SERGAS.
No mes
de xuño, o SERGAS anuncia nos medios de comunicación que vai investir 150 millóns
de ptas. para ampliar a actual casa do mar, declaracións que a Plataforma
considerou desde o primeiro momento “pouco serias”, pois en ningún documento
dos orzamentos da Xunta consta tal consignación económica para este fin.
A
Plataforma aposta inequivocamente pola construcción dun centro de saúde que
unha vila de 18.500 habitantes como Moaña merece e nos corresponde por lei. A
ampliación da actual casa do mar considerámola inviable, porque non achegaría
solucións nin melloras no aspecto sanitario e ademais as negociacións para a
utilización dos terreos colindantes son moi complicadas, xa que ó ser
competencia de Costas requiren a súa concesión, cousa nada fácil como puidemos
comprobar os moañeses coa instalación do saneamento da ría.
Por
outra banda, o incumprimento do acordado respecto das reformas que de xeito
inmediato é necesario acometer nas instalacións da casa do mar, considerámolo
unha burla para os moañeses, cando todos sabemos que calquera dos concellos
limítrofes como Bueu, con menos habitantes, ten máis e mellores servicios que
Moaña. Por todo isto, os grupos municipais do BNG, PsdeG-PSOE e EdeG, en nome
da Plataforma da Sanidade de Moaña, solicitamos que o Pleno da Corporación
adopte os seguintes
ACORDOS:
1) Que o Sr. alcalde informe sobre as xestións levadas
a cabo para a construcción do centro de saúde de Moaña.
2) Que se inclúa nos orzamentos municipais do ano 2002
unha partida para a adquisición dos terreos necesarios para a construcción do
centro de saúde.
Moaña, 26 de marzo
de 2002”
INTERVENCIÓNS:
Interveñen, en primeiro lugar, membros
da plataforma de Sanidade de Moaña, os cales na súa intervención coinciden en
que o Concello execute os seus acordos plenarios. Non é posible a ampliación da
casa do mar polos custos económicos que suporía, hai que construír un centro de
saúde.
O Sr. Martínez Rodríguez vai apoiar o
seu grupo esta moción porque é un recoñecemento xusto e cívico xa que as
atencións recibidas na casa do mar son moi deficientes, existe unha promesa
electoral do grupo de goberno de construír ese centro de saúde, así como unha
piscina climatizada e outros servicios.
O Sr. alcalde quere que o pobo coñeza
que non pretende enganar a ninguén, a situación económica do Concello é moi
mala como acaba de ratificar o seu concelleiro de Facenda, Sr. Cordeiro. O que
se pide é moi xusto pero non por iso hai que facelo xa, non hai partida
orzamentaria para adquirir os terreos e a achega económica necesaria é
imposible por parte do Concello.
No seu momento pedíuselle ó alcalde
xestións para diversas melloras e así se fixo con viaxes a institucións, pero
que quede claro que a competencia e xestión da sanidade é exclusiva do Sergas.
Non é certo que a obra de construcción do centro de saúde estivese incluída no
programa electoral do PP; aínda que se fixeron xestións nas que se logrou o
anteproxecto de ampliación da casa do mar, cun financiamento de cento sesenta
millóns de pesetas, todos os trámites que se realicen para lograr este centro
obterán o apoio do Concello, pero non así a achega económica.
O Sr. Abal Juncal di que aínda que
pareza que o alcalde está en contra da construcción do centro de saúde, non é
así, hai que conseguir o terreo para o edificio a través do convenio
urbanístico, posto que Costas non ó cederá.
O Sr. Millán Otero comprende os veciños
e a plataforma que realizou varios viaxes cos que obtivo resultados moi
básicos, atópase de acordo co manifestado polo concelleiro de urbanismo no
sentido de lograr os terreos a través de convenios urbanísticos.
O Sr. Santos Leites agradece as
propostas do concelleiro de urbanismo e entende que a partir de agora o camiño
está máis despexado. Considera que se o PP non levou a obra no seu programa
electoral que recoñeza a necesidade existente e se deixase de atendela, sería
malo. Cre que é o momento oportuno para obter douscentos cincuenta millóns de
financiamento.
Finalmente intervén o alcalde e
diríxese á oposición para manifestar que está disposto a aceptar a moción se se
modifica a parte dispositiva desta no referente á :
- Punto segundo: realizar xestións
urbanísticas para que a través dun convenio se logre un solar necesario para a
execución da obra.
- Punto tres: que se financie total e
exclusivamente con fondos da Xunta.
Proposta que é aceptada pola oposición.
A
Corporación, en votación ordinaria e por unanimidade dos asistentes, acorda
aprobar a proposta transcrita.
6.- MOCIÓN DO
PSG – PSOE S/ PACTO LOCAL.
O Sr. Martínez Rodríguez adianta o
contido da moción cunha explicación longa e concisa e seu texto literal di como
segue:
“ “
O Sr. Santos Leites adianta que se vai
abster na votación, aínda que recoñece que o Concello asume funcións e
competencias que logo non financia.
O Sr. Millán Otero solicita do PSOE que
retire a moción, do contrario votará en contra.
O Sr. Martínez Rodríguez non contaba
con este tipo de análise tan crítico, o que se pide na presente moción é
mellorar a financiamento para mellorar os servicios do Concello, por iso non
pode cambiar o fondo nin o contido da moción.
Por último, o alcalde diríxese o
portavoz do PSOE, agradeceríalle que retirase a moción, algo que non acepta.
VOTACIÓN E
ACORDO
A Corporación, en votación ordinaria e cun voto a favor (Sr. Julio Martínez Rodríguez do PSOE), e trece votos en contra (Sres. Barreiro Tenorio, Currás Piñeiro, Cordeiro Portela, Abal Juncal, González González, Sotelo Pena, Martínez Couso, Martín Alonso e Entenza Domínguez do PP; Sres. Millán Otero, Moreira Piñeiro, Lorenzo Martínez e Regueira Gómez do BNG) e unha abstención (Sr. Santos Leites de EdeG) acordan rexeitar a moción presentada.
7.- MOCIÓN DO BNG
S/ SEGURO DECENAL NAS
EDIFICACIÓNS
Le a
moción o Sr. Moreira Piñeiro que di:
A Lei
38/1999, do 5 de novembro, de ordenación da edificación, instaurou a
obrigatoriedade de constituír un seguro por parte dos promotores e promotoras
de novas edificacións para protexer os intereses dos consumidores e
consumidoras fronte a posibles vicios estructurais ocultos na construcción,
durante un período de 10 anos.
A lei non diferencia entre
autopromoción e promoción profesional para a venda a terceiras persoas, polo
que, na actualidade, se está a producir unha situación non desexada por quen
lexislou, que afecta a promotores e promotoras de vivendas destinadas ó uso
propio, consistente en que a persoa promotora da vivenda e tomadora do seguro é
a destinataria final desta, véndose obrigada a constituír un seguro para se
garantir a si mesma a cobertura de posibles vicios ocultos na construcción, nos
que obviamente non pode ter ningún interese obxectivo.
O requisito do seguro decenal para
acceder á inscrición no Rexistro da Propiedade provoca a obriga de contratar
este seguro sempre e cando as persoas autopromotoras precisen recorrer ó
financiamento alleo, por exemplo, créditos hipotecarios.
A esixencia de estudios técnicos por
parte das compañías aseguradoras e a imposición de consultings asociados a elas
están derivando no cobro de primas abusivas, que poden supor entre o 10 e o 20%
do valor da estructura asegurada e que, no caso de vivendas unifamiliares, anda
polos 6.000 euros –un millón de pesetas.
Esta
situación, que lle afecta a miles de persoas que pretenden construír a súa
vivenda, para uso propio e sen intención de transmitilas a terceiras persoas, é
especialmente grave no noso país, por estar moi estendida a construcción de
vivendas en réxime de autopromoción ou propia administración, e constitúe un
freo ó normal desenvolvemento da construcción no noso concello.
É por iso que presentamos esta moción
no sentido de instar a modificación da Lei de ordenación da edificación para
exceptuar as edificacións unifamiliares de uso propio das obrigas de
constitución do seguro decenal, sempre que non mude a persoa titular durante os
dez anos seguintes á súa construcción, xa que neste caso procedería constituír
o citado seguro.
Por todo isto, solicitamos do Pleno da
Corporación que adopte o seguinte
ACORDO:
1.-Instar o
Goberno do Estado a modificar a Lei 38/1999, do 5 de novembro, de ordenación da
edificación, no sentido de exceptuar as edificacións que se destinen a vivenda
unifamiliar, promovidas e construídas para uso propio, das obrigas de
acreditación e testemuña da constitución do seguro decenal para inscribilas no
Rexistro da Propiedade.
2.-Dirixirse ós
grupos parlamentarios para que o Parlamento de Galicia inste o Goberno Central
para que modifique esta Lei no sentido expresado no punto anterior.
Moaña, 25 de marzo
de 2002”
O alcalde solicítalle ó grupo do BNG
que retire a moción presentada, o que non é aceptado.
O Sr. Millán pide na moción que se
revise a lei, pois prexudica os nosos conveciños.
O Sr. Abal Juncal recoñece que é un
asunto que hai que resolver de inmediato.
VOTACIÓN E
ACORDO:
A Corporación en votación ordinaria e
con seis votos a favor (Srs. Millán Otero, Moreira Piñeiro, Lorenzo Martínez e
Regueira Gómez, do BNG; Sr. Martínez Rodríguez do PSOE; e Sr. Santos Leites de
EdeG) e nove en contra (Barreiro Tenorio, Currás Piñeiro, Cordeiro Portela,
Abal Juncal, González González, Sotelo Pena, Martínez Couso, Martín Alonso e
Entenza Domínguez do PP) acordan rexeitar a moción presentada.
8.- MOCIÓN DE EdeG-OV S/
ESTABLECEMENTO DA TAXA TOBIN.
Le a moción o Sr. Santos Leites e di:
“MOCIÓN : POLO ESTABLECEMENTO DA TAXA
TOBIN.- Euloxio Santos Leites, concelleiro de Esquerda de Galicia, propón para
o seu debate e posterior aprobación polo pleno da corporación de Moaña, a
seguinte
M O C I Ó
N:
E innegable que o avance que
experimentaron as tecnoloxías da información e comunicación ofrecen un
extraordinario potencial, inimaxinable hai poucos anos, de interaccións entre
as persoas, as organización e os estados, que debería servir para impulsar un
maior nivel de equilibrio no desenvolvemento mundial. Pero, lonxe disto, tamén
é innegable que as consecuencias que se derivan da configuración deste modelo
deben ser, no seu conxunto, negativamente valoradas, xa que supuxeron un maior
afondamento nas desigualdades sociais e na inseguridade económica dos pobos.
O actual sistema financeiro, resido
pola liberdade de movementos de capitais e o desmantelamento das barreiras
comerciais, supuxeron a práctica dunha serie de operacións especulativas,
alleas por completo ás actividades productivas e de intercambio de bens e
servicios. Calcúlase que entre o 80% e o 90% do total das transaccións
financeiras realizadas diariamente en todo o mundo son meramente especulativas
e que o 80%, destas, teñen unha duración inferior a unha semana.
A volatilidade do capital liberalizado
non provoca unicamente devaluacións das moedas e crise financeiras, co
incremento consecuente das taxas de paro, incremento de prezos, violación dos
dereitos humanos, etc. senón que impide a implantación de políticas económicas
equitativas por parte dos gobernos, o que fai imprescindible que estes
recuperen a vontade de intervir no ámbito económico e que non renuncien ás
misións que teñen encomendadas de favorecer o benestar non unicamente dos seus
cidadáns senón tamén do conxunto da cidadanía mundial, partindo dos postulados
da solidariedade.
En 1972, James Tobin, economista
distinguido co premio Nobel en 1981, propuxo o establecemento dunha taxa
internacional que tiña que gravar, cun tipo moi reducido (entre o 0,1% e o
0,25%), as operacións de divisas realizadas a curto prazo, co principal
obxectivo de contribuír a estabilidade dos movementos de capital. A recaptación
obtida por esta taxa, coñecida polo nome de Taxa Tobin, poderíase destinar a satisfacer obxectivos de igualdade
social, de desenvolvemento sostible e de reparacións dos danos causados polas
políticas de liberalización.
Partindo das anteriores consideracións
este Pleno adopta os seguintes
A
C O R D O S:
Primeiro.-
O Pleno do Concello de Moaña apoia o establecemento dunha taxa sobre as
transicións especulativas nos mercados de divisas, taxa tipo Tobin, como
primeiro paso para unha necesaria introducción de mecanismos democráticos de
regulación e control dos mercados e do sistema financeiro. Todo iso coa
finalidade de conseguir unha orde financeira internacional baseada na equidade,
na seguridade e na presibilidade.
Segundo.-
O pleno do Concello de Moaña faculta o Sr. alcalde-presidente para que en nome
desta Corporación, e dentro do seu ámbito de competencias, traslade a adopción
deste acordo a Mesa do Parlamento e o Goberno da Xunta de Galicia e para que
leve a cabo todas aquelas actuacións que considere adecuadas para dar a coñecer
a necesidade de implantar no ámbito internacional os mecanismos citados
anteriormente e subscriba todas aquelas iniciativas que perseguen esta
finalidade.
Terceiro.-
O Pleno do Concello de Moaña acorda solicitarlle á Presidencia da Unión Europea
a axilización dos debates e trámites iniciados polo Consello de Ministros das
Finanzas da UE (ECOFIN), relativos ó informe que a Comisión Europea debe
entregar sobre “vantaxes e inconvenientes da creación dun imposto sobre as
trasaccións financeiras, incluidos o imposto Tobin….” A fin de avanzar na súa
adaptación real.”
INTERVENCIÓNS:
O Sr. Martínez Rodríguez comprende o
contido da moción, pero os socialistas fixeron xestións no Parlamento da nación
e critica que dende o punto de vista da teoría económica, especúlase máis en
bolsa e pensa que o PP non apoiará á moción pos ten tomado medidas no goberno
da nación.
O Sr. Millán Otero di que non se
deron conta os socialistas de que o presidente da Xunta ten tomado medidas a
favor da taxa.
O Sr. Currás Piñeiro adianta que o seu
grupo se absterá pois non entra en motivos económicos.
Finaliza o autor da moción para
advertir de que non deben tomarse con tanta lixeireza asuntos desta
importancia.
VOTACIÓN
E ACORDO:
A Corporación, en votación ordinaria e
con seis votos a favor (Srs. BNG-PSOE-EdeG), nove abstencións (PP) acordan
aprobar a moción nos termos nos que se encontra epigrafado.
8 BIS.- MOCIÓN DE URXENCIA
O portavoz do PSG-PSOE, Sr. Martínez
Rodríguez, solicita da presidencia o tratamento e debate da moción sobre
“Posicionamento institucional apoiando a VI Marcha Antipeaxe” polo procedemento
de urxencia. Ó abeiro do disposto no art. 82.3 do ROF, e con seis votos a favor
(Srs. Millán Otero, Moreira Piñeiro, Lorenzo Martínez e Regueira Gómez do BNG;
Sr. Martínez Rodríguez do PSOE: e Sr. Santos Leites de EdeG) e nove abstencións
(Sres. Barreiro Tenorio, Currás Piñeiro, Cordeiro Portela, Abal Juncal,
González González, Sotelo Pena, Martínez Couso, Martín Alonso e Entenza
Domínguez do PP) declarase a urxencia solicitada.
Seguidamente o Sr. Martínez Rodríguez,
le o texto literal da moción que di:
“
Julio Martínez, concelleiro do grupo municipal do PSG-PSOE no Concello
de Moaña presenta á consideración do Pleno polo procedemento de URXENCIA a
seguinte,
MOCIÓN
Exposición
de motivos:
O
próximo sábado, dentro de dous días, vaise celebrar en Moaña a VI Marcha pola
supresión da peaxe de Rande. Os socialistas, se nos poñemos agora a recordar a
importancia da traxectoria deste movemento cívico nacido en Moaña, durante os
catro últimos anos, non atopariamos palabras de agracedemento polo que a
Plataforma vai significar para a historia deste concello, desta provincia e
mesmo de Galicia. Dun xeito exemplar o movemento cívico acadou tal magnitude,
en canto á consecución de apoios políticos, económicos e sociais respecto á xustiza
da causa que sería difícil para calquera colectivo ou institución xustificar un
posicionamento contrario ós intereses dos cidadáns do Morrazo e de toda a Área
Metropolitana de Vigo. Por todos estes motivos é polo que nos sentimos
orgullosos de que a Plataforma pola supresión da peaxe de Rande nacese en
Moaña.
Propóñolle
ó Pleno que adopte o seguinte,
ACORDO:
Que
o Concello de Moaña faga un pronunciamento institucional apoiando a VI Marcha
antipeaxe e reclame das institucións a total supresión da peaxe de Rande.
Moaña,
11 de abril de 2002 “
Solicita dos grupos que compoñen a
Corporación Local o apoio á marcha e ó seu posicionamento.
A Corporación, en votación ordinaria e
por unanimidade dos asistentes, acorda aprobar a moción nos seus propios
termos.
9.- ROGOS E PREGUNTAS
As preguntas
e rogos formuladas por D. Jacinto García Piñeiro, en representación dos
colectivos pola mellora do trazado da vía rápida do Morrazo, foron contestadas
polo Sr. alcalde.
E, non sendo outro o obxecto, a
Presidencia dá por rematada a sesión, ás 23:20 horas do día fixado no
encabezamento, de todo o que, como secretario, DOU FE.
O ALCALDE O SECRETARIO