ACTA 04/2002

ACTA DE SESIÓN ORDINARIA DO CONCELLO REALIZADO O DÍA 20 DE MAIO DE 2002

ORDE DO DÍA:

1.-APROBACIÓN, SE PROCEDE, DA ACTA ANTERIOR.

2.-DAR CONTA DAS RESOLUCIÓNS DA ALCALDÍA.

3.-APROBACIÓN, SE PROCEDE, DAS CONTAS XERAIS DO

CONCELLO DOS EXERCICIOS DE 1999 E 2000.

4.-APROBACIÓN, SE PROCEDE, CONTAS XERAIS DO

PADROADO BEIRAMAR EXERCICIOS 1999-2000.

5.-APROBACIÓN INICIAL, SE PROCEDE, ORZAMENTO MUNICIPAL

E DO PADROADO BEIRAMAR PARA O EXERCICIO 2002.

6.-APROBACIÓN DEFINITIVA, SE PROCEDE, DO

PROXECTO DE COMPENSACIÓN POLÍGONO IV ROSAL - SUR.

7.-APROBACIÓN INICIAL, SE PROCEDE, PROXECTO DE

URBANIZACIÓN POLÍGONO IV ROSAL – SUR.

8.-APROBACIÓN, SE PROCEDE, PROXECTO FUNDACIÓN

COMARCAL.

9.-APROBACIÓN, SE PROCEDE, RECURSO DE REPOSICIÓN

SOBRE CORRECCIÓN ERROS NAS NORMAS SUBSIDIARIAS.

10.-MOCIÓN EdG S/ SERVICIO CONTRA INCENDIOS.

11.-MOCIÓN DO PSG-PSOE S/ CASTRO DE MONTEALEGRE.

12.-ROGOS E PREGUNTAS.

ASISTENTES:

Sr. alcalde D. JAVIER BARREIRO TENORIO

CONCELLEIROS:

D. Javier Abal Juncal

D. José Manuel Cordeiro Portela

D. Alberto Currás Piñeiro

Dna. María C. Costas Gayo.

D. José González González.

Dna. María Martín Alonso

Dna. Carmen Sotelo Pena

Dna. Carmen Entenza Domínguez.

D. Osbaldo Martínez Couso

D. Julio Martínez Rodríguez

D. Xosé Manuel Millán Otero.

D. Rosendo Moreira Piñeiro.

D. Serxio Regueira Gómez.

Dna. Isabel Lorenzo Martínez.

D. José E. Santos Leites.

Secretario . D. Felipe Fermoso Valdés

Na casa do concello de Moaña, o 20 de maio de 2002, reúnense os devanditos señores baixa a presidencia do Sr. alcalde, D. Javier Barreiro Tenorio, asistidos por min, o secretario, coa finalidade de realizar o Pleno Ordinario da Corporación, anunciado para o día de hoxe ás 20:00 horas, en primeira convocatoria.

A Presidencia declara aberta a sesión ás 20:00 horas.

INCIDENCIAS:

Non asiste e xustifica a súa ausencia D. José Luis Leite Fraga.

Dna. Carmen Costas Gayo, incorpórase ás 20:15 horas no debate do punto 5 da orde do día.

Auséntase D. Osbaldo Martínez Couso ás 21:30 durante o debate do punto cinco.

Por último, ausentase D. José Manuel Cordeiro Portela ás 22:15 debatido o punto nove.

1.-APROBACIÓN, SE PROCEDE, DA ACTA ANTERIOR

Dáse conta do borrador da Acta 3/2002, do 11 de abril de 2002. Apróbase por unanimidade sen modificacións.

2.-DAR CONTA DAS RESOLUCIÓNS DA ALCALDÍA

A Corporación queda ó corrente; non obstante, o portavoz socialista pregunta pola prórroga de contrato dos seis traballadores da recollida do lixo e como estes non foron subrogados pola empresa Urbaser, van quedar fixos no Concello ou pasarán á Mancomunidade. O alcalde dille que neste acto dáse conta exclusivamente das resolucións dictadas, non proceden máis aclaracións.

3.-APROBACIÓN, SE PROCEDE, DAS CONTAS XERAIS DO CONCELLO DOS EXERCICIOS DE 1999 E 2000

O alcalde dá conta dos expedientes dando consta a elaboración das contas xerais do Concello correspondentes ós exercicios 1999 e 2000, dos cales se emitiu informe favorable e non se presentaron alegacións. Os ditos expedientes son coñecidos polos membros da corporación.

VOTACIÓN E ACORDO:

A Corporación, en votación ordinaria e con nove votos a favor (Srs. Barreiro Tenorio, Currás Piñeiro, Cordeiro Portela, Abal Juncal, González González, Sotelo Pena, Martínez Couso, Martín Alonso e Entenza Domínguez do PP) cinco en contra (Srs. Millá Otero, Moreira Piñeiro, Lorenzo Martínez e Regueira Gómez do BNG, e Sr. Santos Leites de Os Verdes) unha abstención (Sr. Martínez Rodríguez do PSOE) acordan aprobar as contas xerais do Concello nos exercicios 1999 e 2000.

4.-APROBACIÓN, SE PROCEDE, CONTAS XERAIS DO PADROADO BEIRAMAR EXERCICIOS 1999-2000

De igual forma o alcalde dá conta dos expedientes onde consta a elaboración das contas xerais do padroado beiramar, exercicios 1999 e 2000, os cales foron informados favorablemente, sen alegacións.

VOTACIÓN E ACORDO:

5.- APROBACIÓN INICIAL, SE PROCEDE, DO ORZAMENTO MUNICIPAL E DO PADROADO BEIRAMAR PARA O EXERCICIO 2002

O alcalde le a memoria que aparece como documento anexo ó orzamento e consta no expediente.

INTERVENCIÓNS:

O Sr. Millán Otero, en primeiro lugar, felicita o Sr. alcalde e delegado de Facenda pola presentación deste documento ó pleno, que por preceptivo legal e recomendacións feitas na auditoría efectúase con seis meses de atraso. Despois de tanto atraso examinado este, é exactamente copia do 2001, excepto ingresos e gastos extraordinarios referidos a Golf-Domaio e Cemiterio, como informa ó interventor.

Minóranse as transferencias de ingresos da Xunta e Deputación Provincial, as cales transfiren o mínimo obrigado e en canto o Estado nada de nada. Redúcese o orzamento en 200 mil euros con respecto ó anterior.

Resalta a falta de xestión política en Moaña, non se atendo o proxecto da Casa de Cultura de Meira, nave de servicios, centro de saúde, etc. e a política de persoal do Concello é desastrosa, como o ratifica o informe do interventor. Os investimentos redúcese a simples pavimentacións sen que haxan proxectos ilusionantes.

O Sr. Martínez Rodríguez manifesta que os orzamentos se debaten desoíndo o informe da auditoría, non traen nada novo, son copia dos anteriores.

Considera que o tema económico é a base para crear benestar, debendo existir consenso e realismo na confección deste documento.

Figuran os mesmos ingresos que no exercicio 2001, excepto o recadado procedente do Golf-Domaio e cemiterios. Os recursos propios fixasen en 900 millóns, existen dúbidas sobre a recadación dos 400 millóns restantes, non se cobra impostos de construccións e existen servicios deficitarios, auga, lixo, etc; non obxecta en modo ningún o informe do interventor.

En canto a investimento, a política é desastrosa, non se recadarán máis de 100 millóns da Xunta; 86 millóns da Deputación, estes por ser obrigados e do Estado cero. Pregunta sobre os investimentos do Estado na illa de San Bartolomé e resalta que os investimentos no Morrazo, lévaos integramente Cangas, non existe investimento ningún para a casa de cultura de Meira, Cuartel da Garda Civil, para a piscina só un millón, por iso votará en contra do orzamento.

O Sr. Santos Leites dálle un suspenso ós orzamentos presentados, manifesta que falta aclarar o contido do orzamento polo seu responsable, neste caso o delegado de Facenda. Mirando a orden do día desta sesión, o grupo de goberno non merece máis que a censura, a estas alturas presentase as contas xerais de 1999 e 2000, faltando a liquidación de 2001. Incúmprense as recomendacións da auditoría, por iso, a incapacidade do grupo de goberno é manifesta.

As subvencións da Xunta e Deputación minoranse e o Estado nada de nada; existe un mal trato continuo de todas as administracións cara a Moaña, o orzamento non recadará máis de 900 millóns, o que quere dicir que ata os 1300 figurados atópase inflado. Conclusión, hai unha ausencia de criterios e obxectivos. Os investimentos redúcense a malas pavimentacións discriminando a barrios como Ameixoada, Broullón e A Fraga.

Concluída as intervencións, o acalde cédelle a palabra ó concelleiro de Facenda quen declina a súa intervención, é o propio alcalde quen lles contesta ós intervenientes anteriores.

O alcalde considera que todo o exposto pola oposición é máis do mesmo e replícalles de forma conxunta.

Non é válido que este ano como os anteriores se entregue o orzamento con antelación a este acto, pois parece que non se informaron do seu contido.

Veñen utilizando de forma ilimitada a súa demagoxia, as obras importantes claro que se atenderán con investimentos procedentes da Xunta, Deputación e Estado (piscina, recuperación da illa de San Bartolomé, beirarrúa de Ramón Cabanillas, Casa de Saúde e cuartel da Garda Civil) as cales serán atendidas con partidas xenéricas dos ditos organismos, como ocorreu co selado do vertedoiro, hoxe unha realidade.

O orzamento preséntase nas datas acostumadas dende fai máis de vinte anos, a excepción do exercicio de 1997. Este orzamento é equilibrado e visto o informe do interventor, propóñolle á Corporación a súa aprobación.

No dereito de réplica, intervén o Sr. Millán Otero e dille ó alcalde que parece estar máis ben na oposición que gobernando, amosa unha falta total de respecto cara ós seus portavoces, debendo matizar en cada unha das intervencións. Ninguén cre na xestión do alcalde, todas as achegas que di non se poden recoller en convenios e pídelle que se fagan as obras da beirarrúa na C-550 e deixe de selado do vertedoiro que o executa a Xunta sen discriminación ningunha. Vistos os orzamentos presentados, a cualificación que merece o alcalde é cero.

O Sr. Martínez Rodríguez manifesta que a crítica da oposición cara ó alcalde é acertada, asegurando que o alcalde de Cangas é un bo xestor, por estas verdades o noso alcalde se sae de ton.

O Sr. Santos Leite critica a falta de investimentos no presuposto e a falta de compromisos por parte doutras administracións; as contas, despois de presentarse fóra de prazo, entréganselle á oposición con pouca antelación para o seu estudio e debate. O orzamento minórase en 25 millóns con respecto ó 2001 e que non crea que existe teoría de conspiración ningunha.

O alcalde contéstalle ó grupo da oposición que sobre lixo, vía rápida non se falou sobre estes temas, que se firmará un protocolo para finalizar a casa do concello e asegura que non se sente perseguido por ninguén, felicita o delegado de Facenda e o interventor pola presentación do orzamento de 2002.

VOTACIÓN E ACORDO:

A Corporación, en votación ordinaria e con nove votos a favor (Srs. Barreiro Tenorio, Currás Piñeiro, Cordeiro Portela, Abal Juncal, Costas Gayo, González González, Sotelo Pena, Martín Alonso e Entenza Domínguez do PP) seis en contra (Srs. Millán Otero, Moreira Piñeiro, Lorenzo Martínez e Regueira Gómez do BNG, Sr. Martínez Rodríguez do PSG-PSOE e Sr. Santos Leites dos OV) e unha abstención (Sr. Osbaldo Martínez), acordan:

1.- Aprobar o orzamento xeral do Concello e do Padroado Beiramar de forma inicial para o exercicio 2002.

2.- Aprobar os documentos anexos, complementarios e inseparables de ambos os orzamentos.

3.- Publicar o dito acordo no BOP para que por prazo de 15 días hábiles se poida reclamar contra este.

O resumo de conceptos de ingresos e partidas de gastos confórmanse no resumo xeral que consta no expediente.

6.-APROBACIÓN DEFINITIVA, SE PROCEDE, DO PROXECTO DE COMPENSACIÓN POLÍGONO IV ROSAL - SUR.

Por proposta do alcalde, retírase o asunto da orde do día, pois hai que matizar no seu contido. A Corporación accede ó solicitado.

7.-APROBACIÓN INICIAL, SE PROCEDE, DO PROXECTO DE URBANIZACIÓN POLÍGONO IV ROSAL – SUR

Consúltase sobre a posible vinculación deste acordo co asunto retirado anteriormente da orde do día, o secretario manifesta que non existe vinculación ningunha.

Seguidamente, lense os informes emitidos polo arquitecto municipal e secretario xeral do Concello que, respectivamente, din como segue;

“Asunto: Proyecto de urbanización de la 4º etapa del Plan Parcial “Rosal Sur”.

Emplazamiento: Plan Parcial “Rosal Sur”-Moaña.

Promotor: Junta de compensación nº 4

Informe:

Se informa favorablemente el expediente en cuestión por ajustarse a las determinacións establecidas al respecto en las NN.SS de Planeamiento del Municipio de Moaña, asi como al Plan Parcial “Rosal Sur”

Nota: Las licencias de primera ocupación de las edificaciones que se ejecuten dentro del ámbito de la etapa en cuestión quedarán vinculadas a la recepción definitiva de la urbanización por parte del Ayuntamiento de Moaña.

Moaña, 14 de maio de 2002

Alfonso Lage Pérez.-Arquitecto Municipal”.

INFORME DE SECRETARÍA

“ASUNTO:APROBACIÓN INICIAL DO PROXECTO DE URBANIZACIÓN

En cumprimento do disposto no art. 54 do Real Decreto 781/86, do 18 de abril, a instancia do Sr. alcalde, emítese informe con base nos seguintes

A N T E C E D E N T E S

1.- D. José Luis Álvarez Souto, promotor do Plan Parcial Rosal Sur, elaborou o proxecto de urbanización no súa IV FASE que desenvolve o dito plan parcial .

2.- O proxecto presentado consta de informe favorable emitido polo arquitecto municipal, tanto en relación coas obras que comprende e o seu detalle, como os documentos e o seu contido.

3.- Sobre a legalidade aplicable e en cumprimento do ordenado, emítese o seguinte

I N F O R M E:

Primeiro.- Lexislación aplicable: art. 31 e 44.3, da Lei 1/97, do 24 de marzo, do solo de Galicia e art. 67 a 70 e 141 do Regulamento de planeamento.

Segundo.- Os proxectos de urbanización son instrumento de execución de plans parciais, o presente executa a IV Fase – Plan Parcial Sur- e contén as determinacións esixidas.

Terceiro.- Aprobado inicialmente, sometérase a información pública polo termo dun mes, mediante publicación de anuncios no DOG, diario de maior difusión da provincia e lugares de costume, co obxecto de oír alegacións que se recollerán previa aprobación definitiva.

CONCLUSIÓN.- Dos antecedentes e consideracións expostas, cabe dicir que o proxecto de urbanización Rosal-Sur IV Fase cumpre a legalidade vixente, deberá tramitarse na forma descrita neste informe.

É canto debo informar, non obstante, o Pleno decidirá.

Moaña, 8 de maio de 2002

O SECRETARIO”

VOTACIÓN E ACORDO:

A Corporación, en votación ordinaria e por unanimidade dos asistentes, acorda aprobar inicialmente o proxecto de urbanización IV fase do Plan Parcial Rosal Sur e que se dean os trámites oportunos.

8.-APROBACIÓN, SE PROCEDE, DO PROXECTO FUNDACIÓN COMARCAL

Dá conta da proposta o portavoz do grupo municipal de PP, Alberto Currás Piñeiro, así como dun resumo das actuacións a levar a efecto para aprobar o proxecto de fundación comarcal, os datos do cal constan en poder dos grupos municipais referidos á achega económica do Concello de Moaña para financiamento dos programas PRODE II e ACADER por importe de 136.969,56 euros así como o repartimento da dita cantidade nas anualidades de 2002 a 2008 ambas inclusive.

INTERVENCIÓNS:

O Sr. Santos Leites pide que no momento da discusión exista diálogo.

O Sr. Martínez Rodríguez di que vai en contra deste proxecto porque entra dentro da filosofía da Xunta, sendo negativo para Moaña.

Para lograr unanimidade interveñen membros da corporación con propostas que ó final son aceptadas polo Sr. Martínez Rodríguez.

VOTACIÓN E ACORDO:

A Corporación, en votación ordinaria e por unanimidade, acordan aprobar o proxecto PRODE II e ACADER, a teor do seguinte acordo:

1.-O Concello de Moaña comprométese a realizar unha achega económica ó financiamento dos programas de desenvolvemento rural PRODER II ou AGADER no ámbito territorial da entidade Fundación para o desenvolvemento da Comarca do Morrazo da que é membro participante, por un importe de 136.969,56 euros, que figurará nos seus orzamentos anuais”.

2.- Que no mesmo acordo establécese o repartimento da citada cantidade por anualidades durante o período de duración da execución dos programas de desenvolvemento rural PRODER II e EGADER, de tal xeito que no cadro que segue se precisa a anualización da participación citada:

ANO 2002 2003 2004 2005 2006 2007 2008

EUROS 6.848,49 20.545,43 27.399,91 27.393,91 27.393,91 13.696,96 13.696,96

9.-APROBACIÓN, SE PROCEDE, RECURSO DE REPOSICIÓN SOBRE CORRECCIÓN DE ERROS NAS NORMAS SUBSIDIARIAS.

Dáse conta do escrito formulado por D. Manuel Pousada Carballo, mediante o que recorre en reposición contra acordo adoptado polo Pleno da Corporación do día 7 de febreiro de 2002 “corrección erros na Unidade de Xestión 5 das NN.SS.

A parte dispositiva do dito acordo di: “tramitarase de acordo co disposto no art. 42.1 de Lei 1/97, do 24 de marzo, do solo de Galicia e no seu lugar se indique que a rectificación de error se publicará no DOG e BOP, notificando acordo os interesados é a CPTOPV.

Igualmente dáse conta de informe emitido polo asesor xurídico en data 23 de abril de 2002, quen manifesta que o expediente en cuestión ha de tramitarse conforme o determina o art. 105.2 da Lei 30/92, do 26 de novembro.

Visto canto antecede, a Corporación, en votación ordinaria e por unanimidade dos asistentes, acorda:

1.- Anular parcialmente o acordo plenario do 7 de febreiro de 2002 no referente á U.G. 5 de Moaña, por non ser necesario someter a tramitación da corrección de erros ó provisto no art. 42.1 da Lei 1/97, do solo de Galicia.

2.- Tramitar a dita corrección de erros materiais, conforme dispón o art. 105. 2 da Lei 30/92, do 26 de novembro.

3.-Seguir os trámites propostos naquel informe.

10.-MOCIÓN EdG S/ SERVICIO CONTRA INCENDIOS

Le a moción o Sr. Euloxio Santos Leites que di:

“MOCIÓN: SERVICIO CONTRAINCENDIOS COMARCAL.- Euloxio Santos Leites, concelleiro de Esquerda de Galicia, introduce para que se debata no Pleno da Corporación de Moaña a seguinte MOCIÓN:

O pasado día 30 de maio do ano 2000, reuniuse a asemblea de todos/as os/as concelleiros/as dos concellos que integran o consorcio para o servicio contraincendios e salvamento da comarca do Morrazo, coa finalidade de aprobar provisionalmente o borrador de estatutos do dito consorcio, a finalidade do cal segundo reza na introducción destes “é a de dar resposta eficaz dos servicios de emerxencia ante calquera circunstancia que poida supor un perigo para a vida das persoas ou os seus bens…

Neste acto foi aprobado o dito borrador de estatutos co cal se daba o pistoletazo de saída para a creación deste importante servicio. Posteriormente, con data 20 de xullo do ano 2000 a comisión xestora remitiu a Consellería de Xustiza copia do expediente tramitado para a constitución do consorcio. Transcorrido en exceso o prazo legal, no mes de novembro, o presidente da comisión xestora (naquel momento, o Sr. Sotelo Villar, alcalde de Cangas) diríxese ás corporacións de Bueu, Cangas e Moaña así como á Deputación de Pontevedra para que no prazo de dous meses os plenos dos concellos aproben definitivamente os estatutos.

No caso concreto do Concello de Moaña os ditos estatutos foron aprobados polo Pleno da Corporación do día 30 de novembro do ano 2000, e dende esta data ata hoxe (ano e medio) non tivemos coñecemento ningún máis sobre estes, nin sobre a creación do parque de bombeiros, nin sobre a dotación del.

Como queira que as competencias da loita contra o lume, tal e como din os estatutos, son da Comunidade Autónoma, e considerando que este é un servicio esencial para a comarca, pois nestes momentos estase ó albur da dispoñibilidade dos bombeiros de Vigo ou Pontevedra para atender os sinistros, que co problema de comunicacións que padecemos pode provocar que calquera lume se converta en algo irreparable pola tardanza en acudir destes efectivos, é polo que dende EdeG solicitámoslle ó Pleno da Corporación a adopción dos seguintes

A C O R D O S

1.- Que o alcalde realice as xestións necesarias para interesarse polo punto no que se atopan os trámites para a creación do consorcio para o servicio contraincendios e salvamento.

2.- Instar a Consellería de Xustiza da Xunta de Galicia para que se dean os pasos necesarios para a creación do dito consorcio e a dotación do parque comarcal de bombeiros.”

VOTACIÓN E ACORDO:

A Corporación, en votación ordinaria e por unanimidade dos asistentes, acordan aprobar a moción transcrita nos seus propios termos.

11.-MOCIÓN DO PSG-PSOE S/ CASTRO DE MONTEALEGRE

Le a moción o Sr. Martínez Rodríguez que, transcrita, di:

“Julio Martínez Rodríguez, como concelleiro do PSOE de Moaña somete á consideración do Pleno a seguinte:

MOCIÓN.- O castro de Montealegre en Domaio está considerado como un dos principais xacementos arqueolóxicos da provincia de Pontevedra de orixe prerrománico, chegando incluso algúns especialistas a considerar que a súa importancia é superior ó xacemento castrexo de Santa Tegra. Dada a importancia do xacemento, a propia Xunta de Galicia consideraba en días pasados a posibilidade de facer un túnel para evitar afectalo polo trazado da vía rápida do Morrazo, tal e como estaba previsto nun principio. Se a administración autonómica considera necesario incrementar considerablemente o orzamento desta infraestructura para facer o túnel e salvar o castro de Montealegre, os socialistas entendemos que a posibilidade de deleite e coñecemento desta xacemento debe garantirse para todos os galegos, tal e como recolle a propia Lei de patrimonio no seu artigo 26 de acceso ó patrimonio cultural de Galicia.

Por todo o manifestado, os socialistas de Galicia propoñémoslle ó Pleno do Concello de Moaña que adopte o seguinte:

ACORDO:

1.- Que o Concello de Moaña demande da Consellería de Cultura que realice un proxecto de musealización sobre o castro de Montealegre en Domaio que contemple a posta en valor do castro mediante a realización dos estudios e escavacións que sexan necesarias.

2.- Que se dote ó castro dun pequeno museo para que poidan ser contemplados pola cidadanía os achádegos que se vaian atopando.”

A Corporación, en votación ordinaria e por unanimidade dos asistentes, acorda aprobar a moción transcrita nos seus propios termos.

INTERVENCIÓNS

O Sr. Millán diríxese a Julio Martínez e maniféstalle que se fose sincera a súa moción, felicitaríao e pídelle que se inclúa no punto 1 da parte dispositiva que se contacte cos propietarios e estes convenien coa Xunta e votará a favor si accede, ó cal contesta afirmativamente.

VOTACIÓN E ACORDO

A Corporación, en votación ordinaria e por unanimidade dos asistentes, acordan aprobar nos seus propios termos a moción presentada.

12.-ROGOS E PREGUNTAS

O Sr. Santos Leites preguntalle ó Sr. alcalde sobre os vertidos incontrolados no río da Fraga e o Sr. alcalde contesta que non ten constancia de tales vertidos e que unha vez entre en funcionamento a EDAR, tomaranse medidas drásticas contra a empresa que efectúe tales vertidos.

E, non sendo outro o obxecto, a Presidencia dá por rematada a sesión, ás 22:25 horas do día fixado no encabezamento, de todo o que, como secretario, DOU FE.

O ALCALDE O SECRETARIO